الكون جه منين؟
الكون يا صديقى , اتكون ازاى؟ سؤال فى منتهى الغرابة طبعا بس صدقنى لسه الاجابة أغرب! هتقولي يعنى أية؟ هقولك هات كوباية
الشاى او القهوة الجميلة بتاعتك وتعالى.
الموضوع بدأ من عند عمك اينشتاين ونظريات النسبية بتاعته اللى ببساطة شديدة كانت بتقول أن الكون بتاعنا ده عبارة عن شبكة اسمها شبكة الزماكان والشبكة دى هى المسئولة عن الجاذبية , هتقولى ازاى يعنى؟ هقولك يعنى تخيل معايا حضرتك فارش مفرش على السرير وشادد المفرش اوى بحيث لو رميت كرة الكرة تلقائيا هتنزل وهتثبت فى أكتر منطقة منخفضة او مستوية اهو الكون بتاعنا هو الكرة دى والشبكة هى المفرش , هتقولي واية علاقة الجاذبية بالموضوع؟ هقولك لما الكرة دى بتستقر بتعمل انحدار فى الاماكن القريبة منها فاي حاجة بعيد هتنزل تدريجيا. هتقولي ماشى وبعدين؟
هقولك تخيل لو رميت حاجات كتير على المفرش ده ومفيش حاجة تحته اية اللى هيحصل؟ ايوة صح المفرش هيقع على الأرض بالظبط كده , ايوة يعنى اية برضو؟ يعنى ببساطة الكون هينهار على نفسه. طبعا الكلام ده فى واقعنا مش منطقى , ازاى يعنى الكون هينهار وهو له 14 مليار سنة حلو وماشى وكله تمام فين الانهيار بقى؟ هقولك انت كده بتفكر زى عمو اينشتاين , عمو اينشتاين كان متضايق يعنى اية الكون هينهار؟ اية العبث ده؟ قال لا الكلام ده مينفعش اكيد فى حاجة بتعاكس الضغط بتاع الكون على الشبكة دى وراح سمى الحاجة دى cosmological constant حاجة كده زى الكون بيزقنى فأنا كمان هزقه معلش محدش احسن من حد , هتقولي اية العبط ده؟ هو اي حد يحط اى حاجة فى معادلة يبقى خلاص كده من غير اثبات ولا مشاهدة ولا اي حاجة؟ هقولك برافو حقيقى انت بقيت زى عمو Alexander Friedmann, Georges Lemaitre هتقولى مين دول بقى؟ 
هقولك اصبر يا صديقي! انا جاية فى الكلام اهو , الجماعة دول كانوا بعض الناس المهتمة بالفيزياء وزمان كان عندهم كل الناس بتهبد فى الفيزياء عادى ولا كأنها علم ولا اى حاجة , المهم الجماعة دول كانوا شايفين ان اينشتاين بيستهبل , اللى هو انت عالم كبير وعلى رأسنا من فوق بس بلاش هبد فى الفيزياء وسبحان الله يا أخي الهبد ده هيطلع صح فى الاخر وهيكون اسمه كمان الطاقة المظلمة بس مش هنتكلم عنها كتير علشان دى حوار لوحدها.
المهم الجماعة دول قالوا فى كذا احتمال لنشأة عمنا الكون ده فمثلا ممكن يكون هو فعلا بدأ حاجة كبيرة ودلوقتى بدأ يصغر لحد ما يختفى فعلا أو هو بدأ كبير جدا يعنى كان حاجة بتتمدد بشكل هائل وفى الحالة دى حتى لو الجاذبية بتعاكس التمدد ده فهو أقوى منها , هتقولي مش فاهم؟ هقولك تخيل معايا الصاروخ لما بنطلقه اية اللى بيحصل؟ هتقولي بتكون سرعته كبيرة لدرجة انه بيتفوق على جاذبية الأرض وبيطلع للفضاء هقولك بالظبط كده ده نفس اللى افترضه العالمين دول. المهم كل الكلام ده فى الاخر كلام يعنى مفيش دليل أو تجربة تثبت الكلام ده وفى العلم الكلام ده مينفعش الى أن ظهر دليل فعلي من تجربة العالم Edwin Hubble وبعض زملائه على الضوء الجاى من النجوم.
العالم ده اكتشف اثناء فحصه للضوء ده انه الأطياف غالب عليه اللون الأحمر , هتقولي واية يعنى ممكن غلطة ولا حاجة؟ هقولك انت كده متهور يا صديقي! هتقولي ازاى يعنى؟
هقولك الكلام ده مش لون ولا اتنين ده كل الألوان اللى ظهرت كان غالب عليها اللون الأحمر , يعنى اية برضو؟ هقولك ان كل الالوان اللى بنشوفها دى عبارة عن أطوال موجية وكل ما زاد الطول الموجي زاد اللون الأحمر. يعنى كل ما الموجة خدت وقت أطول كل ما زاد اللون الأحمر يعنى كل ما اللون الأحمر زاد ده دليل ان الكون بيتمدد أكتر ونتيجة لده الطول الموجى اخد وقت اطول. ده أن دل على شئ هيدل أن معادلات اينشتاين كانت صح من غير ال cosmological constant.
الكلام ده خلى العلماء اختلفوا البعض شاف أن كده الكون كان صغير فدلوقتى بيكبر حاجة بديهية جدا بس مع ذلك بعضهم كان شايف أن مش شرط يكون للكون بداية يعنى الكون بيتمدد واثناء التمدد ده بتنشأ مجرات جديدة بتعوض كثافة المجرات اللى كانت موجودة وتمددت فكده كأننا معملناش حاجة.
طبعا الكلام ده كان بين العلماء وبعضهم بس المشكلة بدأت لما العامة عرفوا عن الخناقة دى , الدنيا قامت حريقة ما احنا لازم نفهم هو الكون أبدى ولا أزلي ولا اية ظروفكم؟
محدش فاهم حاجة لحد ما جه عالمين Arno Penzias , Robert Wilson العالمين دول كانوا بيحاولوا يستكشفوا السماء والمجرات فى وقت فراغهم باستخدام اريل تابع لأحد شركات الاتصالات ,كل مرة كان فى تشويش فى الصور اللى بيشوفوها فضلوا يغيروا اتجاه الاريل ويفحصوه بس برضو مفيش فايدة , لحد ما قرأوا بحث كان لسه هيتنشرعن التشويش ده وبالفعل البحث ده كان صحيح وعرف يشرح سبب التشويش الغريب ده وبسببه العالمين دول اخدوا جائزة نوبل فى حاجة هما مش فاهمينها! هتقولي ازاى؟ هقولك والله محدش فاهم ازاى , ببساطة الجماعة دول قرأوا البحث ده ولخصوه وهوب أخدوا نوبل. هتقولي ليه يعنى البحث ده كان بيقول اية؟
هقولك ببساطة البحث ده كان بيقول ان الكون حاليا بيتمدد وأثبتنا ده الحمدلله واثناء التمدد ده بتقل درجة حرارته وده بيعنى انه كان فى الاول جسم سخن جدا وصغير لدرجة انه ابسط تركيب فى المادة اللى هو الذرة مكنتش قادرة تتكون من كتر السخونة لحد ما الكون وصل عمره 300 ألف سنة درجة حرارته نزلت ل3000 درجة فعلى طول الذرات بدأت تتكون وتكون مواد وبالتالى الدنيا توسع مبقاش فى حاجات كتير فالضوء بدأ يمشى أسهل والطول الموجى بتاعه بدأ يطول ويبرد وكل ما الكون يوسع العملية دى هتفضل مستمرة لحد ما درجة حرارة الكون توصل ل2.7 كلفن هيكون الضوء فى منطقة أشعة الميكروويف لحد ما يطول تماما ويبقى فى طول موجات الراديو وهو ده التشويش اللى شافه العالمين , ده بقايا الطول الموجى للضوء لما كان عمر الكون 300 ألف سنة , هتقولي يعنى اية الكلام ده؟
هقولك تخيل انك بتغلي مياه ومغطي الحلة المياه الاول هتبدأ تتبخر وبعدين شويه شويه هتبدأ تتفكك لأكسجين وهيدروجين مع زيادة درجة الحرارة بس اول ما تشيل الغطى فورا هيبدأوا يتحدوا مع بعض تانى ويكونوا المياه وهو ده بالظبط اللى حصل.
وبس كده يا صديقي , لو وصلت لحد هنا احييك بجد انت شخص صبور ومهتم فعلا.
المصادر :
أنا تقى سيد ،طالبة فى كلية العلوم جامعة أسيوط بحاول اشارك معلومات مفيدة عجبتنى ، أتمنى انى اكون افدتك فى النهاية ومتنساش تقول رأيك فى كومنت وتتابعنى على انستجرام ولينكدان لو حابب طبعاً وتقرأ باقى المقالات وشكرا على اهتمامك.
